‼️ Couple.Murmur系列週邊開賣優惠‼️ 1️⃣ 買1個Couple.Murmur系列手機殼，即可免費獲得Couple.Murmur X Maskology 口罩2盒！(隨機顏色自動發送，送完即止。) 2️⃣由即日起至28/11，可以高達88折優惠價訂購Couple.Murmur系列手機殼！ 🤍Couple.Murmur X KMCOLLAB 聯乘週邊產品🤍 專屬 @couple.murmur 的設計系列週邊產品，這次更邀請了本地設計師 @blaccmict 設計手機殼，大家不容錯過，敬請留意 @kmcollabhk 更新消息！ 「爭氣啦爭氣啦」鏡面iPhone Case 🤍 iPhone 直邊黑框鏡面殼 🤍 材質：TPU 🤍 顏色：銀色/黑色鏡面 🤍 尺寸規格：iPhone 11-15 系列型號 「頭獎冇人中」鏡面iPhone Case 🤍 iPhone 直邊黑框鏡面殼 🤍 材質：TPU 🤍 顏色：銀色/黑色鏡面 🤍 尺寸規格：iPhone 11-15 系列型號 開賣日：21/11 (二) 20:00 HKT 正式接受訂購
訂購價截止日：28/11 (二) 23:59 HKT *訂購Link請留意Bio* (訂購活動完結後，商品將以原價售賣) #香港 #市集 #香港市集 #港嘜 #港嘜市集 #kmcollab #kmcollabhk #周邊 #週邊#hongkong #market #hongkongmarket #香港設計 #香港插畫 #香港插圖 #香港創作 #本地創作 #香港文創 #香港原創 #香港插畫專區 #hkillustration #illustration #design #hkdesign #draw #hkdraw #art #hkart

𝓘 𝓵𝓸𝓿𝓮 𝔂𝓸𝓾 𝓲𝓷 𝓮𝓿𝓮𝓻𝔂 𝓤𝓷𝓲𝓿𝓮𝓻𝓼𝓮.🪐 地球很危險，真想有天可以和你逃離到屬於我倆的星球。 那裡只有月亮、只有星星、只有你、只有愛。🌌 - 今個情人節💘，去一趟專屬您倆的戀愛星球吧！🚀 由 @dicha_jewellery 和 @couple.murmur 共同設計的18K鍍金戀愛星球純銀項鍊💎，配上鑽石，簡約而不失浪漫💞，完美詮釋愛情的真諦。不管是自己佩戴，還是送給心愛的人，都是一個暖心的選擇。 • 心動價❤️： $850 情人節優惠🎁：$800 （即日至2024年2月14日） * 此為預先訂購產品，將在2024年2月1日出貨 * ⁠現貨有限，賣完即止。 • #香港設計 #香港製造

[gfmurmu11527] 同男朋友一齊2年多少少，大家都係大學同學。 雙方外表身材都幾好，但係我地性生活竟然少到成為一個問題。 男朋友唔係對性特別大需求，驗血報告亦指出佢睾丸酮素水平偏低，但又未致於要食藥。 好處係佢唔𥄫女，為人專注認真。 但幾困擾嘅情況係性生活越嚟越少。由當地初開始時每星期幾次到而家可能一個月先一次 ，甚至更少 令我開始自我懷疑，自信都幾受挫。 有試過各種方法嘗試增加男朋友興趣，例如喺佢面前玩玩具，自動波用口，手多多摸佢，情趣內衣等等。即使可以令佢當下有 mood, 但好似仲有反而達到反效果。問題由次數太少，變為興奮而太快射+次數不變除非我主動。令本來已經不多嘅 sex 仲要減少時間… 做完仲要等佢最少幾日聖人模式先開始reset。 有反應過自己欲求不滿嘅問題，自問自己需求都幾大，一個星期一次已經太少。而家一個月都冇一次真係好辛苦，基本上全部靠自己偷偷地DIY。 忍耐咗幾個月之後忍唔住同咗佢講，但男朋友表示除左道歉外真係冇乜辦法。太忙加上本身冇乜性欲 ，好想體諒佢 ，亦好抱歉令佢有壓力。但講完見到佢同我道歉真係好自責，好愛男朋友，但真係唔知點好。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11526] 講講背景先，同男友拍左拖一年半，一齊左幾個月就同居生活，男友之前拍過好多次拖，而我就第一次拍拖，大家都係30歲頭。 男友係專業人士，工作狂好鐘意自己份工(佢話好有使命感)，一星期放兩日假，就算放假但有時因為做唔哂d野都會返公司工作，份工一個月一次帶下camp過夜或格幾個月帶d client去第二個國家做一星期交流團，有時放假佢個老闆好鐘意搞埋哂d員工活動(要所有員工都要出席個d)，個d員工活動要過一晚夜，大約格月咁搞。 而我就做服務性行業，一星期得一兩日假左右，可以拎假放就男友多，每日放工返到屋企晚上11點左右，冇咩朋友，放假都係做下家務咁。 但我想講既係，我唔係因為佢e份工而覺得我拍拖拍到好似單身咁，雖然同居但好似成日都同佢好少見到面，而佢whatsapp都好少同我分享日常，多數都係我分享自己野佢聽，如果我冇搵佢咁個日就可以全日都冇訊息，佢唔鐘意whatsapp，ok咁我咪有咩放工大家返到屋企先傾囉，但同佢分享完佢永遠都好似話題終結者咁，完全唔算叫得上傾計對答，佢又唔會分享今日發生既事我知，佢話：「你比d me time我靜靜地睇手機同朋友whatspp啦！」(咁佢日日收工6點，我返到屋企11點e幾個鐘仲唔夠佢me time咩😅)就係咁佢me time到凌晨1點，終於等到佢放底手機又話要瞓教，日日如是，有日我問佢有咩咁好傾同朋友傾都唔同我傾，佢話多數傾公司野研究點處理d case，都唔會同佢地講日常野。 男友係一個超冇交帶既人，佢好鐘意約朋友出街但次次都冇講聲，係我放工返到屋企(晚上11點)一打開門冇開燈唔見佢先知佢唔係到，次次都係去到夜一夜晚上12點-1點先返黎，頭個幾次會同佢講話約左朋友要講聲，但都係唔會講，後尾我叫佢如果有約寫日歷到，佢會提早一個月寫底哂邊幾日約左人或公司活動日子個d，但到當月突然有朋友即日約個d又唔寫，所以我係又唔知佢約左人定去左邊到，我又再同佢講你其實唔想寫可以whatsapp同我講今晚約左人或者一知到約左人可以同我講聲，之後都係當然照係冇做啦，我話你之前同d女朋友拍拖都唔洗講聲？佢話係架，我之前一直都係咁冇人好似你咁，咩真係有人會覺得另一半冇帶交正常？ 去到2月份我係覺得最唔開心既，個d乜乜乜帶camp呀，去一星期交流團呀，員工活動呀，成個月全部中哂，成個月已經因為公事好少係屋企，2月因為有新年既關係，佢日日約唔同既朋友出街，日日都晚上12點1點先返，有一日佢話要去佢屋企人食團年飯(我返工)，佢話會遲少少返因為佢地年年興食完團年飯會去維園行年宵，去到凌晨兩點佢仲未返，我whatspp問佢返黎未，佢話仲行緊，當然佢當中冇同我講佢會大約幾點返，又冇同我講佢係維園見到d咩得意野分享，再格多一個鐘我再whatspp佢唔覆，我打左幾次電話佢唔聽，最後佢凌晨5點半先返到屋企。 月尾我終於頂唔順同佢傾，話佢近排忽略左我好多，公事忙又有帶camp又有交流團又日日約朋友，我地今個月少見左好多。 佢：「有咩問題？公司d安排我想架咩，咪成個情人節留左比你囉仲未夠咩？每個人放既次序都唔同架啦，我就家人第一，朋友第二，情人係最尾。」 我聽完佢e句我喊到崩潰左，心諗我放你第一位你就放我係最尾，佢話「講完喇嘛？我瞓喇」之後佢就真係瞓左冇理到我有得我喊🙂 終於過左2月去到3月係好左d，見少左朋友，見都係見兄弟個d，有日佢話約左朋友食飯。 我:「咁今次我跟埋同你一齊去啦」(之前從未跟埋去) 佢:「你跟埋黎做咩？我覺得咁好有問題囉，大家諗野好唔一樣，大家好唔夾囉，你再係咁就飛左你，你搬返去你媽到住到時我call車車走你d野」之後每一次鬧交佢都會講e句，其實我真係好唔開心，我想同佢好好溝通但佢次次都想解決我多過d問題。 我地岩岩開始拍拖個陣仲係疫情，反而個陣close好多，未同居個陣公司放飯佢有時會主動過黎陪我食，會日日sd好多訊息，個陣公司唔會叫佢帶camp交流團個d，見朋友都好少見，手機都好少搵朋友訊息，每日放工都會見到佢係屋企等我，之後會一齊攬住睇電視或者食宵夜，疫情過後佢話想要返多d自己間空，見多d朋友，我好肯定佢出面冇第二個因為佢每次都有影相比我睇係成班人去或者同兄弟見面，e加既佢同岩岩疫情既佢雖然變得忽略左我好多，但佢其實仲好錫我，例如知我鐘意食野會成日買野食比我，初初同居發現我著來著去都幾件衫，佢會買衫比我，又會出大部分錢同我一齊去旅行，我屋企人入院又會主動話一齊去探病，又睇唔出感情淡左，因為佢成日都會主動攬攬同講情話，溝通過後佢帶交流團同員工活動個幾日d訊息雖然唔多，但都會有時sd相比我睇分享下。 我其實都知自己係一個好冇安全感同痴身既人，我想問我點先可以令自己唔好成日亂諗野？可以拎自己睇開d同唔好咁痴身？同埋點先可以令佢講多d自己感受我知？我唔想每次因為成日見唔到面而同佢鬧交，好驚因為就咁同佢分手。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11525] 希望admin會揀中我😭😭🙏🏻因為我真係唔知點算好🙇🏻‍♀️可能文筆會有啲kick 🥲 背景：大家都係大學year 4學生，喺三年前一齊，我淨係拍過一次拖而佢拍過6-7次（唔太記得）加上佢以前鍾意落酒吧飲酒同間唔時蒲，又做過ptbf ，不過而家佢唔再落酒吧同冇再做ptbf，而我就唔煙唔蒲，淨係偶然自己會喺屋企開酒飲但冇落過酒吧。 1）佢認為講大話先至維持到一段關係，一旦比人拆穿就會完咗段關係；我認為唔坦白嘅關係唔會長遠。我一早都知佢有對我講過大話但我扮傻扮唔知，但冇諗過我扮傻其實係比緊佢有下次嘅機會，同埋發覺佢講得愈來愈多大話+又講到前後矛盾。上個月有一日佢話佢要返工，由下晝返到凌晨，但其實個日佢係約咗2個中學同學（一男一女）玩兼且仲去一個女仔朋友屋企樓下車佢一齊去目的地（個個女仔已經有男朋友，唔知點解成日都要我男朋友車佢、同佢一齊去酒吧玩）我知嘅原因係因為我有啲懷疑佢所以睇佢電話，果然真係唔會笑住走出男朋友部手機。我事後扮唔知問佢果日你做咩嚟，佢一嚟就答約咗朋友，然後我答你唔係返工咩？跟住佢就答我返工個陣出咗去搵個男性朋友食飯，但完全冇講過個女仔啲嘢。我聽完其實已經唔識點面對佢，唔知佢特登唔講定係點樣，佢比我嘅感覺係好努力咁兜。但總之而家我已經分唔出佢講嘅嘢邊句真邊句假。 2）拍拖一年個陣我為咗慶祝所以特別去手作一個銀包比佢，為咗唔比佢知所以我話我約咗屋企人同親戚所以有幾日約唔到出街。有一次我哋嘈交，點知佢良心當狗肺，因為係驚喜嚟所以唔比得佢知，佢鬧我其實我冇約我屋企人，又話我講大話唔坦白，但其實so far我都只係講咗呢次大話，點都唔會夠你多，同埋你自己都唔坦白憑咩話我？我最尾都死死氣話我其實去咗整禮物比你，仲cap哂對話比佢先告一段落，從此以後我都冇再出街整禮物比佢，只係online shopping 買嘢比佢。 3）我哋一嘈得好勁就會冷暴力我。其實呢個情況發生過幾次，我亦都有同佢講過唔容許有冷暴力，我一直以嚟其實都冇試過冷暴力佢，因為我覺得冷暴力係唔應該出現，第一次係佢突然唔知因為啲咩而嬲我就幾日冇覆我訊息，喺個幾日入面我見住佢同佢啲大學同學玩得好開心，其中有一日佢幫佢嘅女組員溫書仲影人哋瞓覺比佢個朋友……我就食唔安瞓唔落，到最後我頂唔順就話再係咁就分手，去到呢句佢先肯覆我，佢原來係嬲我同個男仔單獨傾project，但我一早有同佢講過果份嘢係老師隨機抽人，二人一組，咁我可以點樣唔同佢傾而又做到功課？再講佢自己都有同個女組員單獨傾project，但個份嘢係6個人+佢哋已經有開signal group，我到而家都唔明佢有咩資格話我。 4）佢會del咗同女組員傾計嘅單獨對話，佢答我係因為唔值得keep ，同埋我同男仔傾嘅對話全部都冇del到，我驚佢有一日唔信我咁可以拎嚟睇。其實我唔知點解要del，你除咗身有屎先會del，邊度有咩值唔值得？最kick嘅位係以前讀緊asso 同女組員嘅對話又唔del? 覺得我睇會好眼冤？我一直都唔反對佢識新朋友，只要唔好咁過火就得同埋唔單獨出街就得，萬一出就同我講聲。但我一直以嚟除咗因為小組考察所以要同啲男組員出去，其餘時間都唔會同男組員出去。 呢4個點其實我一直以嚟都過唔去，我更加諗唔明點解佢要講大話我哋嘅關係先會keep 到落去？亦都唔明點解佢咁雙重標準，自己犯錯就得，我犯錯就要比你鬧。好後悔有一日搵佢傾心事跟住佢話講大話一定會存在，聽完佢講呢句我心都寒哂已經唔識點同佢相處同埋亦都好抗拒佢，但我都扮冇嘢咁日日見佢因為我哋同居緊。有人建議我同佢分開，但我因為唔識拍拖同埋係痴身女友而當咗佢係我精神之柱😭所以好難斷捨離，亦都有朋友叫我調教下佢但我無從下手。有冇人教我點做？😢🙏🏻 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11525] 交代返背景先，小妹同男朋友拍咗拖三年幾，性生活方面一直都好正常，無唔滿意對方嘅要求，大概都keep住一個星期一次。 事緣係上個禮拜用緊某前T字頭social media嗰陣，無意中發現有個同男朋友個名幾相似嘅account，我撳入去睇，見到個頭像幅相同之前佢出去影嘅風景相好似，去check返相簿發現係同一張，咁我就知一定係佢，因為佢平時都唔會send自己影嗰啲相比其他人。 我一直都唔知佢喺呢個social media有account，一撳入去following嗰度，嘩，不得了，全部都係女女，有片有相有可以約嘅，全部都好大尺度，我當時真係嚇親，因為一直都唔知佢鍾意睇呢啲，以為淨係上網隨便search自己處理就算。我驚到手震，好似發現咗佢陰暗面咁。 之後我就再睇吓佢like咗咩post咁啦，碌吓碌吓見到有個post話 ”想x我的like一下”，見到佢like咗，個心即刻沉咗一下。我唔知佢係認真咁樣諗，定係純粹嗰吓興致高like咗，我好驚，諗佢係咪嫌棄我身材唔夠好要做呢啲嘢。 我即刻放低咗部電話唔再睇，想忘記佢，因為咁樣好似窺探佢私隱咁，覺得對唔住佢。佢之前一直冇同我講，可能就係驚我會亂諗嘢，所以我無問佢關於個account嘅嘢，但係我唔知佢開呢個account係嚟做咩，係用嚟約炮？定係佢純粹用嚟睇女？我唔知，都唔夠膽問佢，始終係我自己發現到，佢唔同我講可能都係唔想我知。 之後我都有冷靜落嚟，覺得男人睇女都好正常啫，可能佢只不過係鍾意睇呢類型，冇講俾我知都係因為驚衝擊到我。但係我都係咁亂諗嘢，覺得佢下1秒就要出軌，雖然我哋一直都好sweet，平時都冇咩異樣，鬧交都會即日好返。我有試過問佢自己處理嗰陣會唔會幻想同人哋做，佢就話唔會，仲問我做咩咁突然問。 依家我都唔知直唔直接問佢好，驚佢好大反應，但係就想問吓大家意見，到底男人平時like咗嘅post係用嚟save低，定係認真認同個post講嘅嘢，想咁樣做？希望大家可以幫吓我🙏🏻 Sorry for 1999 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11524] 呢件事困擾左我好耐 希望小編會抽中我🥲🙏🏻 女24 男友細一年 ，經朋友介紹認識 ，一齊左一年多少少。 大家屋企都係中產 ，要比較嘅話男友家境係好少少。由細到大屋企人都對我好好 ，可以話係有求必應。但我自己讀書同時都有返part time ，因為我鍾意奢侈品，平時睇啱又儲到錢就會買。屋企人以往有送過一兩樣俾我做生日禮物，但我唔想每次攤大手板問佢哋拎錢買 ，所以就自己賺錢買花戴 。 喺我哋一齊左接近一年嗰陣互相見左家長 ，噩夢就喺呢度開始 。佢媽第一次見我嗰陣 ，打完招呼 ，問完我點稱呼之後 ，問我第二句 ，個袋你自己買架？(我當日孭左個接近$20000嘅手袋 係我自己返工儲錢買)我當下好愕然 ，有咩可能會問得出呢個問題。😅 我話: 係呀auntie我自己返工儲錢買架，然後佢媽媽就話: 咁就啱啦 ，自己想要嘅嘢 ，自己儲錢買 ，唔好要人買比你呀知唔知呀？做女仔咁樣就唔得體。 我一聽完就覺得佢係暗示緊我唔好洗佢個仔錢， 平時我同男朋友食飯睇戲係今次你俾 ，下次我俾咁樣 ，咁我地大家都有各自返part time 。食完飯之後我就私底下同男朋友講 ，佢媽啱先咁樣講嘢令到我唔好受 。佢話係我自己諗多咗 ，佢媽唔係咁嘅意思 ，我聽完有啲唔開心 ，但又唔想繼續爭論就冇再提起件事。 到我前排生日 ，男朋友送左樣四位數中嘅首飾俾我 。佢覺得生日節日呢啲送貴重禮物無所謂。呢幾日同佢屋企人食飯 ，佢媽媽見到我新戴住樣首飾 ，就問: 好靚喎，之前未見過你戴嘅 ，新買架？ 我就答佢係xxx 送俾我做生日禮物 ，佢媽一聽完 即刻收起笑容話 : 我個仔對你真係好，咁錫女朋友 ，佢都未送過咁貴重嘅嘢俾我呀 。 我無講嘢，只係好勉強俾左下笑容。 直到食完餐飯我真係忍唔住爆喊咁同男朋友講我好委屈 ，明明我咩都冇做過 ，點解佢媽要咁樣講嘢 ？加上點解佢唔當時即刻幫我講嘢解圍嗰啲？佢就話咁唔通我駁佢 ，媽咪呀你唔好咁樣講野啦 咁樣呀？咁一係以後唔好見佢哋囉，以後我唔帶你同佢哋食飯 ，咁咪冇事囉。 我聽完內心好崩潰 ，如果佢想同我行得長遠 ，點解會認為唔見就解決到件事？定佢冇諗過要同我行得長？但佢平時真係對我好好 ，百般遷就 ，我地相處都好少鬧交。同埋想知係我自己諗多咗定佢媽真係暗寸緊我話我拜金？😭🙏🏻 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[bfmurmur1857] 同女朋友都係26歲，係中學同學，識左十幾年，一齊左5年，同居左一段時間，仲有養貓，當正係我地嘅小朋友咁，大家一直都好開心，每逢生日、紀念日都會用心為對方準備，我一直都好錫佢，都認定大家係將來結婚對象，至少我係。 早幾個月發覺佢禁多左電話，應該係同人send緊message，好多時係我睇唔到嘅角度，所以唔知佢同邊個傾計，但我都冇為意，我覺得同fd傾下計冇咩問題，都唔係下下要專登係我面前禁，所以都冇去特別注意。一段短時間之後，唔知係我形住定點，佢好似有少少專登唔係我面前send message甚至開whatsapp睇，就算覆whatsapp都有d避開我見到既角度，好似我一行埋去佢就會熄左whatsapp咁，但當時我都冇懷疑佢啲咩，覺得可能只係咁岩，而我地之間相處都冇咩改變。 而再早一段時間我因為一啲興趣而識左班新朋友，因為同女朋友同居所以好多時都帶埋佢一齊出去，所以佢都同我班朋友熟絡左，多數我地都係一齊出去同呢班朋友玩，早幾個月佢除左禁多左電話，都出多左街同呢班朋友玩，我唔得閒或者唔去佢都會自己去，咁我亦都不以為意，雖然當中有男有女，但因為佢同其中幾個女仔熟，其實都同佢自己嘅朋友冇咩分別，所以佢出去同佢地玩我都唔會覺得出奇。 佢本身都識打扮，但平時多數著長褲長裙，舒服為主，而因為果班朋友都成日會出黎吹下水，冇話去咩特別地方或者活動，多數大家都係hea look或者休閒舒服style，而果排佢係有多左打扮，甚至著短裙仔。 近呢個月我感覺上佢好似少左同人whatsapp，亦都少左同我果班朋友出去，我地不嬲都有大家手機password，但唔會check大家，有一晚佢沖緊涼，我手機係第二個位叉緊電，突然想用facebook search啲野，佢手機係我附近，我就順手拎左黎用，而我見到個whatsapp icon，我下意識就禁左入去想望一望。 我係個對話list碌左一陣，其實都唔知想睇啲咩，但突然見到有一個對話係mute左，唔係group，係我班朋友入面既其中一個男仔（我同佢唔係好熟，反而平時係女朋友同佢fd啲），同人pm都冇咩大不了，但我好好奇點解要mute，加埋之前種種跡象，我就撳左入去睇。 我第一下見到最新果幾句對話係兩個月前，個男仔叫我女朋友唔好再搵佢，一個月後，我女朋友仲搵佢想約佢出嚟，男仔拒絕左，我女朋友追問佢，但佢應該係block左我女朋友，冇覆亦都冇read，只係睇左呢幾句我已經好驚，我一路碌上去睇，見到女朋友話掛住個男仔，我仲諗會唔會係好玩得好fd嘅朋友之間講笑果種，我繼續睇，好希望係我誤會左佢，但因為女朋友沖緊涼我冇咩時間睇，所以碌得好快飛住睇，最明顯見到嘅係相同片，我女朋友影左好多自拍去引個男仔，當中仲有好多裸露🔞嘢，連拍片都有，男仔冇影佢自己啲乜野，只係普通分享生活嘅相例如食物相，其實睇到呢到我已經成個人震晒，好心痛好嬲好驚，之後再睇詳細少少佢地對話，好多情慾對話，亦都有普通吹水傾計，我女朋友仲對個男仔噓寒問暖，好關心佢，佢地就好似熱戀中嘅情侶咁。 冇錯，從對話中得知佢地已經搞過，應該仲要唔止一次，應該仲車震過，而最可怕係，從對話得知佢地仲影左閃卡，但whatsapp入面冇，如果我睇左可能真係返唔到轉頭。個男仔已經結左婚，我唔識佢老婆但會見到佢地ig，佢老婆係大緊肚，呢段時間睇佢地ig冇異樣，而且一直都好恩愛，我唔知個男仔突然斬纜係因為佢老婆知道左定良心發現定玩厭左，但我女朋友居然仲繼續搵佢，人地已經有家庭，究竟我女朋友係純粹當佢sp定係真係有鍾意佢？ 成件事最可怕嘅係，佢竟然一直都冇del對話，利用左我地之間嘅信任，以為我永遠都唔會check佢手機，佢嘅🔞嘢都冇del，連限時都冇set，佢真係咁信個男仔？係咪代表佢真係有鍾意對方而唔係純粹sp？我未試過有sp，啲人成日話男人性同愛可以分得好開，可能我女朋友送到埋嘴邊咪食，咁女人係咪性同愛都可以分得好開？定係唔多唔少都會有感情？ 我女朋友仲未知我已經知道左，我個腦空白一片咩都諗唔到，我想像唔到枕邊人係一個咁嘅人，對住我以外嘅男人咁淫，我覺得好恐怖，佢送上門去完個男仔屋企下一日仲ig post我地嘅sweet嘢，其實我仍然覺得佢好愛我，我依家好努力扮到同平時冇分別，因為我未決定到分唔分手，我地一齊經歷左好多快樂時光，雖然未結婚，但我地都已經建立左個「家」，我唔知我原唔原諒到佢。但我呢一刻仲係好愛佢，我有諗過扮唔知，但好驚女朋友仲繼續搵個男仔，或者將來有其他人，亦都好驚佢真係鍾意左個男仔。我應唔應該暗示已經知道左啲野，等佢知驚就算，唔好令大家咁難堪返唔到轉頭，然後繼續一齊？有冇人試過咁樣嘅情況仲可以原諒對方繼續一齊落去，對方亦改過唔出軌？係咪真係永遠都會有條刺？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11523] 講返先 ，小妹今年17 ，準備緊dse ，有個拍咗幾年ge男朋友，同過屋企人講過自己係27歲前無結婚打算 ，終身唔會生小朋友 。一係覺得自己無能力撐起一頭家 ，二係因為原身家庭唔太好有陰影。 話就係咁講 ，但係我媽媽嗰邊較封建 ，佢expect我18歲開始相親（佢講叫我嫁去佢鄉下 但係佢鄉下d男人係男尊女卑嗰d） 20歲最好結到婚 ，25歲前抱到仔 ，咁我都有同佢傾過自己意願，但每次都係不歡而散。 之前同媽翻鄉下，訓緊覺聽到佢同我姨媽講等18就捉我翻去嫁 ，宜家我仲有半年成年，又就來dse 。但係我驚到成日失眠 ，專注唔到溫書 ，幾乎成日都要食安眠藥先訓到 ，我媽又唔知係邊聽d偏方 ，話食安眠藥會影響生育（？，抌曬我d藥，宜家日日驚到失眠仲要比佢um我為咗打機唔訓覺，但我真係好驚 。 sor for 1999 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[bfmurmur1856] 我同女朋友兩年，識佢嗰陣時候已經知佢好迷信，佢會成日去求神拜佛，成日會睇生肖嗰啲嘢，佢咩都會信，例如通靈/占卜/塔羅牌/水晶/睇相果啲，咩都會信。 佢嘅迷信程度都幾誇張，有幾個例子。佢會喺IG買嗰啲魔法蠟燭，同埋做魔法儀式，成個過程就係你WhatsApp佢，之後俾啲資料佢，跟住就等到佢Sd翻張相比你，同你講已經完成，之後隔幾日佢就會問你拎feedback。 去睇面相，個師傅話佢粒墨唔好，佢就會走去脫。 去問簽，佢份工係靠佣金，師傅話佢呢一年都唔會搵到錢，佢就索性辭職，呢一年翹埋雙手。我一直都認為信仰呢啲，我唔會去干涉佢，但我有時覺得佢係走火入魔。 事緣我唔知佢睇咗咩野，之後佢同我講佢要整容，但竟然唔係整靚個樣，佢要整大個鼻頭，要鼻頭有肉先會有錢，我聽完有少少呆咗，雖然鼻頭有肉聚財呢個我都有聽過人講，但我冇諗過會有人特登去整大個鼻。 我開始覺得佢好奇怪，我係愛佢嘅，我可以包容到佢，但我係咪應該勸吓佢呢？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11522] 本人26歲，女 ，呢大半年都一直有兩個曖昧對象（利申：3個都係單身，冇道德問題），認真魔人散去，請勿相認。最近想開始穩定落嚟，拍拖結婚，但唔知揀邊個好，希望可以抽中我，比啲意見🙏🏻 A男：28歲白羊座。180cm8xkg，有keep住做運動。而家搵緊6000-8000左右，但會keep住加，三年後應該會搵到30000，獨生仔屋企有車，租私樓（應該25000租，唔係佢比），唔洗比家用 B男：30歲山羊座。183cm9xkg 肥仔。而家搵緊緊35000左右，應該要等啲老海鮮走左先有得繼續升，獨生仔屋企冇車，租私樓（應該10000租 ，佢比，但唔洗再額外比家用） 日常相處： A:好典型嘅白羊座，超級火爆，有咩唔啱就鬧咗先，不過呢半年為左我改咗好多，而家有咩事都可以好平心靜氣咁講。但唔會主動約我出街，通常都係我叫佢約先約，平均兩個星期先會單獨出一次街，平時有班common fd 會約出黎，完左都會送我返屋企。但每一次出街都係喺港島，食完飯有戲睇就睇，冇就返屋企，好悶，但我見到佢就會好開心，有好多野我想佢陪我做，佢都會因為冇興趣而唔想。 B:對我超級好，每一次出街都會諗好多唔同嘅嘢玩，會怕我悶帶我去好多唔同嘅地方。對我啲野都好上心，我講完嘅野通常下一次都做到，我問佢買a定b 好，之後決定買自己比錢買b，佢會買左a當禮物咁下一次出街送比我，去餐廳食飯都係叫兩個我想食嘅野再share食。佢聽到我同fd 講想去睇展覽，會主動問我可唔可以比佢陪我，但明明佢係0興趣。 總結： A:做緊30-70分嘅野，但我會有20-90分嘅開心，因為我好中意佢，佢做嘅嘢會好影響我情緒。係大上大落嗰款 B:做緊60-100分嘅野，都有40-90分嘅開心，對我係超級好，但我唔知自己係唔係只係中意佢對我好。 如果我細多一兩年，我會無條件揀a，但而家要諗埋結婚嘅話我就唔識揀，我唔知我可以中意a幾耐。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶

[gfmurmur11521] 我同男朋友一齊住，佢媽媽（大約60）住附近，所以間唔中會一齊屋企食晚飯。我同男朋友會一齊睇韓國戀愛綜藝。有日佢媽過黎食晚飯，佢話一齊播果套戀綜食飯睇，我話Aunti會唔會睇唔明。 雖然同長輩一齊睇電視電影冇問題，有時我地都會一齊睇Netflix 果啲綜藝，但未試過一齊睇戀綜，因為我覺得成件事勁odd，後生仔拍拖嘅野長輩未必明，同埋我有陣時見到搞笑情節會講，「佢兩個咁鳩嘅😂😂」 ，但長輩未必鐘意聽依啲用字。結果男朋友話唔使擔心，佢媽咩類型綜藝都睇 i.e Too hot to handle, 單身即地獄 所以睇得明。 結果一開播 佢就係咁問問題。加上我又要就住自己情緒咁睇（要注意用詞🥲) 又盡量講啲佢明嘅野。例如我同男朋友講：個女仔個樣好有科技感。Auntie就問即係咩意思 跟住問哇乜個主持咁似啲女偶像，韓國天氣咁凍 個個都著短裙仔嘅，依個參加者係咩名……etc 我地其實都係啱啱睇第一集 邊記得到啲名，不如記出場次序 男1 男2 女1女2，或者記面部特徵似邊個明星更好 i.e 男1= 許光漢，睇多幾集自然記得啲名架啦 ，結果佢問邊個係許光漢，結果佢又堅持記名 。仲有其中個環節要求參賽者發送信息俾心動嘅人，佢問點解只可以腥俾一個人，其實好多戀愛綜藝都係咁，明明佢有睇過單身即地獄，點解會問依啲？我真係唔知點答。 佢份人相處落其實幾好，不過我始終覺得唔係所有野都適合一齊做一齊睇 ，尤其是戀愛節目真係好怪。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——
♡投稿請按 @couple.murmur IG主頁鏈結!
#hongkong #couple #lovestory #hkig
#香港 #情侶