🎥 ម្ចាស់​ទូក​ទេសចរណ៍​នៅ​ឃុំ​កំពង់ភ្លុក​ជួសជុល​ទូក​រង់​ចាំ​ទទួល​ភ្ញៀវ​ក្រោយ​វិបត្តិ​កូវីដ​១៩ ទូក​ទេស​ចរណ៍​នៅ​តំបន់​ទេសចរណ៍​បឹង​ទន្លេសាប​ចាប់​ផ្តើម​មាន​សកម្មភាព​ឡើង​វិញ​​ក្រោយ​ពី​ជំងឺ​កូវីដ១៩​បាន​បង្ខំ​ឱ្យ​ប្រទេស​នានា​បិទ​ព្រំដែន​ ហើយ​ដែល​បាន​ធ្វើ​ឱ្យ​សេដ្ឋកិច្ច​ពិភព​លោក​ជា​ពិសេស​វិស័យ​ទេសចរណ៍ ​ជាប់​គាំង​ និង​ធ្លាក់​ចុះ​ប្រមាណ​២​ឆ្នាំ​នោះ។ ​លោក ហ៊ុល រស្មី​ រាយការណ៍​ពី​ឃុំ​កំពង់ភ្លុក  ស្រុក​ប្រាសាទ​បាគង ​ខេត្ត​សៀមរាប​ដូចតទៅ៖ 👉 សូមចូលទៅចុច Link នៅក្នុង Bio ដើម្បីទស្សនាវីដេអូនេះ និងវីដេអូផ្សេងទៀត • • • • • • • • • • • • #voakhmer #cambodia #covid19kh

ទូក​ទេសចរណ៍​ដេក​រណែល​តាម​ផ្លូវ​ដី​នៅ​ក្នុង​តំបន់​នេសាទ​មួយ​កន្លែង​ជាប់​បឹង​ទន្លេសាប។ កៅអី​ទូក​ខ្លះ​ ត្រូវ​គេ​យក​មក​ដាក់​ចោល​លើ​ផ្ទៃ​ដី​ ស្ថិត​នៅ​ក្នុង​ឃុំ​កំពង់ភ្លុក​ ស្រុក​ប្រាសាទ​បាគង ​ខេត្ត​សៀមរាប។​ ម្ចាស់​​ទូក​ទាំង​នោះ​ គឺ​ជា​ពលរដ្ឋ​នៅ​ឃុំ​កំពង់​ភ្លុក​ ទី​ដែល​មាន​អ្នក​នេសាទ​ជាង​ ៩០០​គ្រួសារ​រស់​នៅ។​ ក្នុង​​ចំណោម​ទូក​រាប់​សិប​គ្រឿង​ដែល​ចត​ចោល​នោះ​ គឺ​មាន​​ទូក​ប្រមាណ​ ២០%​ ត្រូវ​បាន​ជួសជុល​រង់​ចាំ​ដឹក​អ្នក​ទេសចរ​ ខណៈ​ទូក​ខ្លះ​ទៀត​បាន​ផ្តល់​សេវា​ដល់​អ្នក​ទេសចរ​បណ្តើរៗ​ហើយ។ កំពុង​ជួសជុល​ទូក​ទេសចរណ៍​មួយ​នៃ​ទូក​របស់​លោក​ចំនួន​៥​គ្រឿង​ លោក​ គន់ ថា​ អាយុ​៣៧​ឆ្នាំ​បាន​ប្រាប់​វីអូអេ​ថា ​នៅ​ដំណាក់​កាល​ដំបូង​នេះ​ភ្ញៀវ​ទេសចរ​ខ្មែរ​មក​លេង​ឃុំ​កំពង់​ភ្លុក​ច្រើន​ជាង​ភ្ញៀវ​បរទេស។ ​ បុរស​ដែល​បាន​ប្រកប​មុខ​របរ​នេះ​៧​ឆ្នាំ​មក​ហើយ​នោះ​បាន​ឱ្យ​ដឹង​ថា​  លោក​បាន​ជួសជុល​ទូក​បាន​៣​គ្រឿង​ហើយ​ក្នុង​ចំណោម​ទូក​របស់​លោក​៥​គ្រឿង​ ដើម្បី​ត្រៀម​ជូន​ភ្ញៀវ​ទៅ​ទស្សនា​តំបន់​ទេសចរណ៍​ធម្មជាតិ​ រួម​មាន​បឹង​ទន្លេសាប ​តំបន់​ព្រៃ​រនាម​ និង​ព្រៃគុប។ ​ លោក​ថ្លែង​ថា៖ ​«ពួក​ខ្ញុំ​អ្នក​កាណូត ភ្ញៀវ​គឺ​​មាន​អារម្មណ៍​ថា​ នឹង​អាច​មាន​ភ្ញៀវ​វិល​មក​វិញ​  ទោះ​ជា​វា​​មិន​បាន​ដល់​ទៅ​៥០%  ​ក៏​​តែ​៣០%​ឬ​៤០% ក៏​ពួក​ខ្ញុំ​សប្បាយ​ចិត្ត​ដែរ»។ ​ លោក​រំឭក​ថា ​សម្រាប់​លោក​ជា​អ្នក​នេសាទ​ផងនោះ​​ ផល​ប៉ះពាល់​បណ្តាល​មក​ពី​ជំងឺ​កូវីដ​១៩​មក​លើ​​គួ្រសារ​របស់​លោក​គឺ​មាន​កម្រិត​តិច​ជាង​អ្នក​រស់​នៅ​ទីក្រុង ​និង​អ្នក​រស់​នៅ​តាម​ទី​ប្រជុំជន។ ​ប៉ុន្តែ​សង្គ្រាម​ប្រទេស​រុស្ស៊ី​ឈ្លានពាន​ប្រទេស​អ៊ុយក្រែន​កំពុង​ធ្វើ​ឱ្យ​សាំង​ឡើង​ថ្លៃ​ និង​បង្ក​ការ​លំបាក​ដល់​អ្នក​រត់​ទូក​ទេសចរណ៍​ ខណៈ​ចំនួន​ទេសចរ​មិន​ទាន់​កើន​ឡើង​ច្រើន​នៅ​ឡើយ។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #pandemic #Covid19 ​

ក្រោយ​​ការ​បោះ​ឆ្នោត​ក្រុម​ប្រឹក្សា​ឃុំ​សង្កាត់ អាណត្តិ​ទី៥ ដែល​បាន​ប្រព្រឹត្ត​ទៅ​កាល​ពី​ថ្ងៃ​ទី​៥ ខែ​មិថុនា​ លទ្ធផល​បឋម​បាន​បង្ហាញ​ថា​គណ​បក្ស​កាន់​អំណាច​បាន​ឈ្នះ​ភ្លូក​ទឹក​ភ្លូក​ដី​ ខណៈ​បក្ស​ភ្លើង​ទៀន​ដែល​ដឹកនាំ​ដោយ​អតីត​តំណាងរាស្រ្ត​ និង​មន្រ្តី​ជាន់​ខ្ពស់​គណបក្ស​សង្គ្រោះ​ជាតិ ឈ្នះ​បាន​តែ​៤​ឃុំ​ប៉ុណ្ណោះ។ ការណ៍​នេះ​នាំ​ឱ្យ​​អ្នក​វិភាគ​មួយ​ចំនួន​លើក​ឡើង​ថា​​​បក្ស​ប្រឆាំង​ឈ្នះ​តំណែង​មេ​ឃុំ​ចៅ​សង្កាត់​តិច​បែប​នេះ គឺ​ដោយ​សារ​តែ​ការ​ប្រេះ​ឆា​ផ្ទៃ​ក្នុង​របស់​អតីត​គណបក្ស​សង្រ្គោះ​ជាតិ ដែល​ធ្លាប់​មាន​សំឡេង​គាំទ្រ​ច្រើន​កាល​ពី​អាណត្តិ​មុន។ អ្នកវិភាគ​នយោបាយ លោក​បណ្ឌិត មាស​ នី​ បាន​លើក​ឡើង​ថា​ការ​បែក​បាក់​គ្នា​ក្នុង​ចំណោម​មន្រ្តី​​ជាន់​ខ្ពស់​របស់​អតីត​គណបក្ស​សង្គ្រោះ​ជាតិ​ និង​ការណ៍​​ដែល​បក្ស​ភ្លើង​ទៀន​ទើប​តែ​ងើប​ឡើង​វិញ ដើម្បី​​​រៀប​ចំ​រចនា​សម្ព័ន្ធ បាន​ជាង​៣​ខែ​ នៅ​មុន​ការ​បោះ​ឆ្នោត គឺ​ជា​​ហេតុ​ផល​ចម្បង​ដែល​ធ្វើ​ឱ្យ​បក្ស​មួយ​នេះ មិន​មាន​ការ​គាំ​ទ្រ​ច្រើន​សន្ធឹក​សន្ធាប់ ដូច​អតីត​គណបក្ស​សង្គ្រោះ​ជាតិ​ កាល​ពី​ឆ្នាំ​២០១៧។ លោក​ថ្លែង​ថា៖ «មន្ត្រី​គណបក្ស​សង្គ្រោះ​ជាតិ​ហ្នឹង​បាន​បែង​ចែក​ទៅ​ជា​ច្រើន​ក្រុម ជា​ពិសេស​ គឺ​ការ​ចែក​ទៅ​បង្កើត​គណបក្ស​ផ្សេងៗ​ហ្នឹង​ផង។ ម្យ៉ាង​ទៀត​ មន្ត្រី​ដែល​ធ្លាប់​មាន​វោហារ​សព្ទ​ពី​មុន ​ក៏​មិន​បាន​ចូល​រួម​ឱ្យ​បាន​ស​ស្រាក់​សស្រាំ​ដូច​កាល​ពី​សម័យ​សង្គ្រោះ​ជាតិ​ហ្នឹង»។ ​​​​​​​​​​​​​​​ស្រដៀង​គ្នា​នេះ សាស្ត្រាចារ្យ​វិទ្យាសាស្ត្រ​នយោបាយ លោក ឯម សុវណ្ណារ៉ា ប្រាប់​វីអូអេ​ថា​ជម្លោះ​រវាង​គ្នា​ឯង​នៃ​អតីត​មន្ត្រី​បក្ស​សង្គ្រោះ​ជាតិ​ និង​លម្ហ​នយោបាយ​មាន​ភាព​មិន​សេរី រួម​ទាំង​ការ​ធ្វើ​ទុក្ខបុកម្នេញ​ផ្នែក​នយោបាយ​​ទៅ​លើ​បក្ស​ប្រឆាំង​មួយ​នេះ ជា​កត្តា​​ដែល​ធ្វើ​ឱ្យ​ពួក​គេ​​មិន​ទទួល​បាន​អាសនៈ​ច្រើន។ លោក​មាន​ប្រសាសន៍​ថា៖ «ត្រូវ​បាន​គំរាម​កំហែង​ ឬ​ប្តឹង​ផ្តល់​អ៊ីចឹង ​គឺ​បាត់​ឱកាស​ហើយ​រយៈពេ​ល​នៃ​ការ​ឃោសនា ឬ​ក៏​ចូលរួម​ធ្វើ​សកម្មភាព​នយោបាយ​របស់​គណបក្សភ្លើង​ទៀន​ហ្នឹង រយៈពេល​ខ្លី​នៅ​ក្នុង​អំឡុង​ពេល​៤​ខែ​អ៊ីចឹង វា​តិច​ណាស់។ វា​ពិបាក​បញ្រ្ជាប ហើយ​សំឡង​បែក​គ្នា​ទៀត​ធ្វើ​ឱ្យ​ប្រជាពល​រដ្ឋ​មិន​ជឿ​ជាក់​ទៅ​លើ​បក្ស​ប្រឆាំង​ទាំង​អស់​ទេ។ អ្នក​ខ្លះ​មិន​ទៅ​បោះ​ អ្នក​ខ្លះ​អ៊ីចឹង​ ដូច​អ្នក​គាំ​ទ្រ​លោក កឹម​ សុខា អ៊ីចឹង​ជាដើម»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #election2022kh #politicskh

កាសែត The Washington Post ​បាន​រាយការណ៍​កាល​ពី​ថ្ងៃ​ចន្ទ​ ដោយ​ដក​ស្រង់​ប្រភព​ពី​មន្ត្រីប្រទេស​លោក​ខាង​លិច​មួយ​ចំនួនថា ចិន​កំពុង​សាងសង់​ទីតាំង​កងទ័ព​ជើង​ទឹក​របស់​ខ្លួន​មួយ​ដោយ​សម្ងាត់​នៅក្នុង​ប្រទេស​កម្ពុជា​សម្រាប់​ប្រើប្រាស់​ផ្ដាច់​មុខឱ្យ​កងទ័ព​របស់​ខ្លួន ប៉ុន្តែ​ប្រទេស​ទាំង​ពីរ​បាន​បដិសេធ​ជុំវិញ​រឿង​នេះ​និង​បាន​ចាត់​វិធានការសំខាន់​ផ្សេងៗ​ទៀត​ដើម្បី​បិទ​បាំង​នូវ​ប្រតិបត្តិការ​របស់​ខ្លួន។ កាសែតនេះ​បាន​រាយការណ៍​បន្ត​ទៀត​ថា ការសាងសង់​ទីតាំងយោធាចិន​នេះ នឹង​ត្រូវ​ធ្វើ​ឡើង​នៅ​ផ្នែក​ខាង​ជើង​ក្នុង​មូលដ្ឋាន​កងទ័ព​ជើង​ទឹក​រាម​ក្នុង​ខេត្ត​ព្រះសីហនុ របស់​កម្ពុជា​ហើយ​ពិធី​សម្ពោធ​ការចាប់ផ្តើមនៃ​ការ​សាងសង់​ទីតាំង​នេះ នឹង​ត្រូវ​ធ្វើ​ឡើង​នៅ​ក្នុង​សប្តាហ៍​នេះ។ នេះ​បើ​យោង​តាម​មន្ត្រីនៃ​ប្រទេស​លោក​ខាង​លិច​ទាំង​នោះ​ដែល​បាន​និយាយប្រាប់​កាសែត @washingtonpost ​ក្នុង​លក្ខខណ្ឌ​មិន​បញ្ចេញ​ឈ្មោះ​ដោយ​សារតែ​វា​ជា​បញ្ហាដ៏​រសើប។ កាល​ពី​ចុង​សប្តាហ៍​កន្លង​ទៅ​នេះ មន្ត្រី​ចិន​មួយ​រូប​នៅក្នុង​ទីក្រុង​ប៉េកាំង​បាន​ប្រាប់​កាសែត The Washington Post ថា ​ផ្នែក​មួយ​នៃ​មូលដ្ឋាន​កងទ័ព​ជើង​ទឹក​រាម​នេះ នឹង​ត្រូវ​ប្រើប្រាស់​ដោយ​កងទ័ព​ចិន។ មន្ត្រី​ចិន​រូប​នេះ​បាន​បដិសេធ​ថា មូលដ្ឋាន​នេះនឹង​មិនត្រូវបាន​ប្រើប្រាស់​ផ្តាច់​មុខ​ដោយ​កងទ័ព​ចិន​នោះ​ឡើយ​ ហើយ​ថា​ក្រុម​អ្នក​វិទ្យាសាស្ត្រ​ក៏​នឹង​ប្រើប្រាស់​ទីតាំង​នោះ​ផង​ដែរ។ មន្ត្រី​ចិន​រូប​នេះ​ក៏​បាន​បន្ថែម​ទៀត​ថា ចិន​នឹង​មិន​ពាក់​ព័ន្ធ​ក្នុង​សកម្មភាព​ណា​មួយ​ ​នៅផ្នែក​ម្ខាង​ទៀត​នៃ​មូលដ្ឋាន​កងទ័ព​ជើង​ទឹក​នេះ​ ដែលគ្រប់គ្រង​ដោយ​ដោយ​កម្ពុជា​នោះ​ឡើយ។ នៅ​ពេល​សួរ​ជុំវិញ​បញ្ហា​នេះ ស្ថានទូតកម្ពុជា​នៅ​ក្នុងរដ្ឋធានី​វ៉ាស៊ីនតោនបានបញ្ជាក់​ប្រាប់​កាសែត​ The Washington Post នៅ​ក្នុង​សេចក្តី​ថ្លែងការណ៍​មួយថា ខ្លួន‍«បដិសេធ​យ៉ាង​ខ្លាំងជុំវិញ​ខ្លឹមសារ​និង​អត្ថន័យនៃ​សេចក្តី​រាយការណ៍នេះ ដោយ​ថា វា​ជា​ការ​ចោទ​ប្រកាន់​ដោយ​គ្មាន​មូលដ្ឋាន​និង​មាន​បំណង​បង្ខូច​កេរ្តិ៍​ឈ្មោះ​ប្រទេស​កម្ពុជា។ ស្ថានទូត​កម្ពុជា​ក៏​បានបន្ថែម​ផងដែរ​ថា កម្ពុជា​គោរព​យ៉ាង​ខ្ជាប់​ខ្ជួន​រដ្ឋធម្មនុញ្ញ​របស់​ខ្លួន​ដែល​មិន​អនុញ្ញាត​ឱ្យ​មានមូលដ្ឋាន​កងទ័ពបរទេស​ឬ​វត្តមាន​កងទ័ព​បរទេស​នៅ​ក្នុង​ប្រទេស​កម្ពុជា​នោះ​ឡើយ»៕ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia ​#reamnavalbase #china #indopacific #geopolitics #southchinasea

គណបក្ស​នយោបាយ ​និង​អង្គការ​សង្គម​ស៊ីវិល​មួយ​ចំនួន​ បាន​លើក​ឡើង​ពី​​ភាព​មិន​ប្រក្រតី​ ​ផ្សេងៗ​ពាក់ព័ន្ធ​នឹង​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់ អាណត្តិ​ទី​៥ ដែល​ធ្វើ​ឡើង​កាល​ពី​ថ្ងៃ​ទី​៥ ខែ​មិថុនា ឆ្នាំ​២០២២។ គណបក្ស​ប្រជាធិបតេយ្យ​មូលដ្ឋាន​ កាល​ពី​ព្រឹក​ថ្ងៃ​អង្គារ បាន​ធ្វើ​សន្និសីទ​សារព័ត៌មាន​មួយ​ ដោយ​បាន​រៀបរាប់​ពី​ភាព​មិន​ប្រក្រតី​នៅ​តាម​ការិយាល័យ​ ​និង​មណ្ឌល​បោះឆ្នោត​មួយ​ចំនួន ក្នុង​តំបន់​ដែល​គណបក្ស​បាន​ដាក់​បេក្ខជន​ឈរ​ឈ្មោះ។ នៅ​ក្នុង​សន្និសីទ​សារព័ត៌មាន ថ្នាក់ដឹកនាំ​គណបក្ស​ប្រជាធិបតេយ្យ​មូលដ្ឋាន ​បាន​បញ្ជាក់​ពី​ភាព​មិន​ប្រក្រតី​មួយ​ចំនួន​​ដូចជា ​ការ​បិទ​ទ្វារ​ការិយាល័យ​នៅ​ពេល​រាប់​សន្លឹក​ឆ្នោត ការ​កត់​ឈ្មោះ​ពលរដ្ឋ​ពី​សំណាក់​អាជ្ញាធរ​ភូមិ​ឃុំ​ ករណី​មេ​ឃុំ​ចៅ​សង្កាត់​​ពី​គណបក្ស​កាន់​អំណាច​ឈរ​នៅ​ក្បែរ​ការិយាល័យ​ ឬ​មណ្ឌល​បោះឆ្នោត​​​ និង​ការ​ខកខាន​របស់​ស្ថាប័ន​រៀប​ចំ​ការ​បោះឆ្នោត​ក្នុង​ការ​បំពេញ​តាម​សិទ្ធិ​របស់​ភ្នាក់ងារ​គណបក្ស​ជា​ដើម។ ប្រធាន​គណបក្ស​ប្រជាធិបតេយ្យ​មូលដ្ឋាន ​លោក​ យ៉េង វីរៈ ​បាន​ឲ្យ​ដឹង​ថា​​​ យោង​តាម​ករណី​ខាង​លើ គណបក្ស​ប្រជាធិបតេយ្យ​មូលដ្ឋាន​ បាន​​រៀបចំ​ដាក់​​ពាក្យ​បណ្តឹង​ជា​បន្ត​បន្ទាប់​​ទៅ​កាន់​អង្គភាព​ និង​ស្ថាប័ន​ពាក់ព័ន្ធ​ ដើម្បី​ត្រួតពិនិត្យ​ និង​ស៊ើប​អង្កេត។ លោក​ថ្លែង​ថា៖ «អ៊ីចឹង​ យើង​មាន​បណ្តឹង​ខ្លះ​ដែរ ខ្ញុំ​មិន​បាន​រាប់​ទេ ប៉ុន្តែ​ប្រហែល​ក្រោម​ដប់។ ប៉ុន្តែ​យើង​ត្រូវ​តែ​ប្តឹង ​ហើយ​ករណី​ហ្នឹង ប៉ុន្មានៗ​ទៀត​ប្តឹង​ផ្ទាល់​មាត់​អី​អ៊ីចឹង​ទៅ ឬ​ក៏​ថា​យើង​ធ្វើការ​កត់​សម្គាល់​អី​អ៊ីចឹង​ទៅ។ ប៉ុន្តែ​បណ្តឹង​ជា​លាយលក្ខណ៍​អក្ស​មាន​ក្រោម​ដប់។ សម្រាប់​យើង​ មួយ​ករណី​ក៏​ដោយ ពីរ​ករណី​ក៏​ដោយ គឺ​យើង​ទទួល​យក​អត់​បាន​នោះ​ទេ»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #election2022kh #politicskh

👉វិបត្តិ​អ៊ុយក្រែន៖ កងទ័ព​រុស្ស៊ី​​និង​​​អ៊ុយក្រែន​បាន​ពើប​​ប្រយុទ្ធគ្នា​យ៉ាង​ខ្លាំង​នៅ​​តាម​ដង​ផ្លូវ​នានា​ក្នុង​ទីក្រុង Sievierodonetskដែល​ស្ថិត​នៅ​ភាគ​ខាង​កើត​ប្រទេស​អ៊ុយក្រែន​កាល​ពី​ថ្ងៃ​ចន្ទ​ម្សិលមិញ​ ហើយ​ប្រធានាធិបតី​​អ៊ុយក្រែន​បាន​និយាយ​ថា កងកម្លាំង​រុស្ស៊ី​ក៏មាន​បំណង​ដណ្តើម​​កាន់កាប់​ទីក្រុង Zaporizhzhia ដែល​ជា​ក្រុង​​​ដ៏​សំខាន់​មួយ​ទៀត​​​នៅ​ភាគ​​អាគ្នេយ៍​អ៊ុយក្រែន​ផង​ដែរ។ អ្នក​នាំពាក្យ​រដ្ឋបាល​ក្រុង Sievierodonetsk បាន​ថ្លែង​តាម​ទូរទស្សន៍​ថា ស្ថានភាព​ក្នុង​ទីក្រុង​នេះ​កំពុង​មាន​ការផ្លាស់​ប្តូរ​គ្រប់​ពេលវេលា។ ដោយ​ឡែក​ប្រធានាធិបតី​អ៊ុយក្រែន​លោក Volodymyr Zelenskyy បាន​និយាយ​ថា កងកម្លាំង​អ៊ុយក្រែន​មាន​​ឱកាស​​​គ្រប់​ពេល​ដើម្បី​​​បង្កើន​ការគ្រប់​គ្រង​របស់​ខ្លួន​លើ​ទីក្រុង​នេះ។ ការវាយ​តម្លៃ​របស់​លោក​បាន​កើតមាន​ឡើង​​បន្ទាប់ពី​អភិបាល​តំបន់ Luhansk លោក Serhiy Haidai បាន​និយាយ​ថា កងកម្លាំង​អ៊ុយក្រែន​កំពុង​ចាញ់​ប្រៀប​​​កងទ័ព​រុស្ស៊ី​នៅ​ក្នុង​ទីក្រុង​នោះ។ បើ​ទោះ​ជា​យ៉ាង​ណា​ក៏​ដោយ ទាំង​រុស្ស៊ី​និង​អ៊ុយក្រែន​បាន​​ផ្តល់​ព័ត៌មាន​ពី​​ការខូច​ខាត​​របស់​ភាគី​ទាំង​ពីរ​ខុស​គ្នា​យ៉ាង​ខ្លាំង។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Ukraine #Russia

🎥 រលក​កម្តៅ​ដែល​បង្ក​ឡើង​ដោយ​ការ​ប្រែប្រួល​អាកាសធាតុ​ធ្វើ​ឱ្យ​វិសមភាព​កើន​ឡើង ខែ​មីនា និង​មេសា​គឺ​ជា​ខែ​ដែល​ក្តៅ​បំផុត ឬ​ជិត​ដល់​កម្រិត​ក្តៅ​បំផុត​ក្នុង​កំណត់ត្រា​នៅ​ទូទាំង​អាស៊ី​ខាង​ត្បូង។ ការិយាល័យ​ឧតុនិយម​របស់​ចក្រភព​អង់គ្លេស​បាន​លើក​ឡើង​ថា ការ​ប្រែប្រួល​អាកាសធាតុ​ធ្វើ​ឱ្យ​រលក​កម្តៅ​កើន​ឡើង​១០០​ដង។ រលក​កម្តៅ​ទាំង​នោះ​នឹង​មិន​ត្រឹម​តែ​​ធ្វើ​ឱ្យ​មនុស្សម្នា​អស់​កម្លាំង​កំហែង​ប៉ុណ្ណោះ​នោះ​ទេ វា​ក៏​ធ្វើ​ឱ្យ​ប៉ះពាល់​ផ្នែក​ហិរញ្ញវត្ថុ​របស់​មនុស្ស​ម្នាក់ៗ​ផង​ដែរ។ នេះ​ជា​ឧទាហរណ៍​មួយ​ទៀត​ពី​របៀប​ដែល​ការ​ប្រែប្រួល​អាកាសធាតុ​កំពុង​ធ្វើ​ឱ្យ​មាន​​ផល​ប៉ះពាល់​ទៅ​លើ​សេដ្ឋកិច្ច​ និង​ធ្វើ​ឱ្យ​អ្នក​ក្រ​កាន់​តែ​ក្រ​ទៅៗ។ លោក Steve Baragona នៃ​ VOA រាយការណ៍​ពី​រឿង​នេះ។ អ្នកនាង ស្រេង លក្ខិណា​ ជូន​សេចក្តី​ប្រែសម្រួល​ដូច​តទៅ៖ 👉 សូមចូលទៅចុច Link នៅក្នុង Bio ដើម្បីទស្សនាវីដេអូនេះ និងវីដេអូផ្សេងទៀត • • • • • • • • • • • • #voakhmer #cambodia #climatechange

👉វិបត្តិអ៊ុយក្រែន៖ រដ្ឋមន្ត្រី​ការបរទេស​រុស្ស៊ី​លោកSergei Lavrovត្រូវ​បង្ខំចិត្ត​​​លុប​ចោល​ដំណើរ​ទស្សនកិច្ច​របស់​លោក​ទៅ​កាន់​ប្រទេស​ស៊ែប៊ី​​នៅ​ថ្ងៃ​ចន្ទ​នេះ បន្ទាប់ពី​​ប្រទេស​ជិត​ខាង​របស់​​រុស្ស៊ី​​ជា​​ច្រើន​បាន​​បិទ​ដែន​អាកាស​របស់​គេ​​​មិន​ឱ្យ​យន្តហោះ​រុស្ស៊ី​ឆ្លងកាត់។ នេះ​បើតាម​ការ​ឱ្យ​ដឹង​ពី​មន្ត្រី​មួយ​ចំនួន​ហើយ​ដែល​ត្រូវ​បាន​​រាយការណ៍​ដោយ​ទី​ភ្នាក់ងារ​ព័ត៌មាន AFP។ លោកLavrov មាន​គម្រោង​ជួប​ពិភាក្សា​ជាមួយ​មន្ត្រី​ជាន់​ខ្ពស់​នៅ​រដ្ឋធានី​ប៊ែលក្រាដ​នៃ​ប្រ ទេស​ស៊ែប៊ី​ដែល​ជា​​សម្ពន្ធ​មិត្ត​​មួយ​របស់រុស្ស៊ី​ក្នុង​​ចំណោម​សម្ព័ន្ធមិត្ត​​មួយ​ចំនួន​តួច​ដែល​នៅ​សេស​សល់​ក្នុង​​ទ្វីបអឺរ៉ុប ចាប់តាំង​ពី​កងទ័ព​រុស្ស៊ី​​ចាប់ផ្តើម​ការវាយ​ប្រហារ​ខាង​យោធា​លើ​​ប្រទេស​អ៊ុយក្រែន​កាល​ពី​​ចុងខែ​កុម្ភៈ​មក។ ប្រទេស​មួយ​ចំនួន​ដែល​នៅ​ជិត​ស៊ែប៊ី​បាន​បិទ​​ការទាក់ទង​របស់​ខ្លួន​​ដោយ​បដិសេធ​មិន​ឱ្យ​​យន្តហោះ​​រុស្ស៊ី​ដែល​ដឹក​លោកSergei Lavrov ហោះ​កាត់​ប្រទេស​របស់​គេ​ទៅ​កាន់​ប្រទេស​ស៊ែប៊ី។ ប្រសិន​បើ​គ្មាន​ការបិទ​ព្រំដែន​​អាកាស​របស់​​សហភាព​អឺរ៉ុប​និង​​ប្រទេស​ជា​សមាជិក​របស់​​អង្គការ​អូតង់​នោះ គណៈប្រតិភូ​​រុស្ស៊ី​ប្រហែល​​ជា​ត្រូវ​​មក​ដល់​ទីក្រុង​ប៊ែលក្រាដ​​របស់​ស៊ែប៊ី​ហើយ​នៅ​ពេល​នេះ។ នេះ​បើតាម​​​ទី​ភ្នាក់ងារ​ព័ត៌មាន​រុស្ស៊ី​មួយ​ចំនួន​ដែល​បាន​​ដកស្រង់​សម្តី​​​អ្នកនាំ​ពាក្យ​​ក្រសួង​ការបរទេស​រុស្ស៊ី​​​លោក​ស្រី Maria Zakharova។ ទន្ទឹម​នឹង​នេះ​ដែរ កាសែត Vecernje Novostiដែល​ជា​កាសែត​​ប្រចាំថ្ងៃ​របស់​ស៊ែប៊ី​បាន​រាយ ការណ៍​ថា ប្រទេស​ប៊ុលហ្ការី ម៉ាសេដ្វាន​និង​ប្រទេស​ម៉ុងតេណេហ្គ្រោ​បាន​​បដិសេធ​​មិន​ផ្តល់​ដែន​អាកាស​ហោះ​ហើរ​របស់​ខ្លួន​ចំពោះ​​យន្តហោះ​រុស្ស៊ី​ដែល​ដឹក​​រដ្ឋមន្ត្រី​ការ​បរទេស​រុស្ស៊ី​រូប​នេះ។ ប្រភព​​ការ​ទូត​រុស្ស៊ី​មួយ​បាន​ប្រាប់​ទី​ភ្នាក់ងារ​ព័ត៌មាន​រុស្ស៊ី Interfaxថា រុស្ស៊ី​គ្មាន​ជម្រើស​អ្វី​ផ្សេង​ក្រៅពី​ត្រូវ​លុបចោល​ដំណើរ​ទស្សនកិច្ច​នោះ​ឡើយ។ ខណៈដែល​ប្រទេស​ស៊ែប៊ី​បាន​ថ្កោលទោស​សកម្មភាព​របស់​រុស្ស៊ី​ក្នុង​ប្រទេស​អ៊ុយក្រែន ស៊ែប៊ី​មិន​បាន​ចូលរួម​​ជាមួយ​សហភាព​អឺរ៉ុប​នៅ​ក្នុង​ការដាក់​ទណ្ឌកម្ម​ប្រឆាំង​នឹង​រដ្ឋាភិបាល​ក្រុង​មូស្គូ ថ្វីបើ​ស៊ែប៊ី​ស្វះស្វែង​ចូល​ក្នុង​សហភាព​អឺរ៉ុប​ក៏ដោយ។ ប្រទេស​ទាំង២មាន​ទំនាក់​ទំនង​ជិតស្និទ្ធ​យូរ​អង្វែង​ហើយ​រដ្ឋាភិបាល​ក្រុង​ប៊ែលក្រាដ​កាលពី​ពេល​ថ្មីៗនេះ​បាន​ចុះហត្ថលេខា​លើ​កិច្ចសន្យា​ថ្មី​ដែល​មាន​រយៈពេល៣ឆ្នាំ​ដើម្បី​ទទួល​ឧស្ម័ន​ធម្មជាតិ​របស់​រុស្ស៊ី៕ #ukraine #russia

លោក នួន អាត បង្ហាញ​ការ​អស់​ទឹក​ចិត្ត​របស់​លោក​នឹង​ការ​ធ្វើ​នយោបាយ​នា​ពេល​នេះ ក្រោយ​គណ​បក្ស​ភ្លើង​ទៀន​របស់​លោក​មិន​បាន​ឈ្នះ​តំណែង​មេឃុំ​ពាមឧក​ញ៉ាអុង​ក្នុង​ស្រុក​ល្វាឯម ខេត្ត​កណ្តាល កាល​ពី​ការ​បោះ​ឆ្នោត​ក្រុម​ប្រឹក្សា​ឃុំ​សង្កាត់ នា​ថ្ងៃ​អាទិត្យ ទី​៥ ខែមិថុនា ឆ្នាំ​២០២២។ លោក អាត អាយុ​៧១​ឆ្នាំ ដែល​ឈរ​ឈ្មោះ​ជា​បេក្ខជន​មេឃុំ​មក​ពី​គណ បក្ស​ភ្លើង​ទៀន ឲ្យ​ដឹង​ថា​គណបក្ស​ឈ្នះ​តែ​មួយ​អាសនៈ​ប៉ុណ្ណោះ​ក្នុង​ចំណោម​៧​អាសនៈ​ក្នុង​ឃុំ​ពាម​ឧកញ៉ាអុង។ លោក​ប្រាប់​វីអូអេ​ថា៖«តាំង​ពី​មាន​គណបក្ស​មក(គណបក្ស សម រង្ស៊ី)​ ឃុំ​ពាម​ឧកញ៉ា​អុង​មិន​ដែល​ធ្លាក់​ដល់មួយ​កៅ​អី​ទេ​ អត់​ដែល​មាន​ទេ។ មាន​តែ​៣កៅ​អី​រហូត​តាំង​ពី​គណបក្ស​សម រង្ស៊ី​ ភ្លើង​ទៀន​នេះមក​ ៣​កៅ​អី​រហូត...អ៊ីចឹ​ងមក​អាណត្តិ​នេះ ខ្ញុំ​ថា​តស៊ូជាមួយ​ភ្លើងទៀន​ក្រែង​លោ​សើ​រើ​បាន​វិញ​ខ្លះ បាន​ពីរ​ឬ​បី​កៅ​អី​ក៏​ខ្ញុំ​អស់​ចិត្ត​ដែរ​ ស្រាប់​តែ​បាន​មួយ​កៅ​អី​វា​ហួស​ការ​គិត​ស្មាន​របស់​ខ្ញុំ»។ លោក អាត ស្ថិត​ក្នុង​ចំណោម​បេក្ខជន​របស់​គណបក្ស​ភ្លើង​ទៀន​រាប់​ពាន់​នាក់​ដែល​មិន​បាន​ឈ្នះ​ការ​បោះ​ឆ្នោត​ក្រុម​ប្រឹក្សា​ឃុំ​សង្កាត់​អាណត្តិ​ទី​៥​នេះ ដូច​នឹង​ការ​បោះ​ឆ្នោត​កាល​ពី​ឆ្នាំ​២០១៧។ ក្តី​សង្ឃឹម​ពួក​គេ​ប្រែ​ជា​ការ​នឹក​ស្មាន​មិន​ដល់ នៅ​ពេល​គណបក្ស​ទទួល​បាន​ការ​គាំទ្រ​តិច​ជាង​គណបក្ស​ប្រជាជន​កម្ពុជា។ លោក អាត ជា​អតីត​មេឃុំ​ពាម​ឧកញ៉ាអុង កាល​ពី​ឆ្នាំ​២០១៧ នា​ពេល​គណបក្ស​ប្រឆាំង គឺ​អតីត​គណបក្ស​សង្រ្គោះ​ជាតិ​មាន​សំឡេង​គាំទ្រ​ច្រើន។ អតីត​គណបក្ស​សង្រ្គោះ​ជាតិ​បាន​ឈ្នះ​តំណែង​មេឃុំ​ចៅ​សង្កាត់​ប្រមាណ​៥០០ និង​អាសនៈ​ក្រុម​ប្រឹក្សា​ប្រមាណ​៥​ពាន់​នៅ​ទូទាំង​ប្រទេស​។ ប៉ុន្តែ​លទ្ធផល​នៃ​ការ​បោះឆ្នោត​ក្រុម​ប្រឹក្សា​ឃុំ​សង្កាត់​លើក​នេះ បាន​ធ្វើ​ឲ្យ​លោក ​នួន អាត ​សោកស្តាយ​ជា​ទីបំផុត។ លោក​ថ្លែង​ថា៖ «ខ្ញុំ​សោក​ស្តាយ​ៗ បើ​ធ្វើ​ត្រឹម​ត្រូវ យុត្តិធម៌ គឺ​ខ្ញុំ​អត់​សោក​ស្តាយ​ទេ។ នេះវា​អយុត្តិធម៌ អយុត្តិធម៌​ចំពោះ​ពលរដ្ឋ​ដែល​លោកខំ​ទៅ​បោះ​ឆ្នោត​​ឱ្យ ធ្វើ​ឱ្យ​ខ្ញុំ​សោក​ស្តាយ»។ 📷លោក នួន អាត បេក្ខជនឈរឈ្មោះឲ្យគណបក្សភ្លើងទៀន ក្នុងឃុំពាមឧកញ៉ាអុង ស្រុកល្វាឯម ខេត្តកណ្តាល ថ្ងៃទី ៦ ខែមិថុនា ឆ្នាំ២០២២។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #election2022kh #politicskh

បើ​តាម​ការ​ផ្សាយ​របស់​គណៈ​កម្មាធិការជាតិ​រៀបចំ​ការ​បោះ​ឆ្នោត​(គ.ជ.ប)​អំពី​លទ្ធផល​បោះ​ឆ្នោត​បឋម និង​ការ​អះអាង​របស់​មន្រ្តី​គណបក្ស​កាន់​អំណាច គណ​បក្ស​ប្រជាជន​កម្ពុជា​ទំនង​​ឈ្នះ​តំណែង​មេឃុំ​ចៅ​សង្កាត់​ស្ទើរ​ទូទាំង​ប្រទេស។ អ្នកនាំពាក្យ​គណបក្ស​ប្រជាជន​កម្ពុជា​ លោក សុខ ឥសាន ក៏​បាន​ប្រាប់​វីអូអេ​នៅ​ថ្ងៃ​ចន្ទ​នេះ​ថា លោក​ កត់​សម្គាល់​ថា​គណបក្ស​ប្រជាជន​កម្ពុជា​នាំ​មុខ​គណបក្ស​ដទៃ​ទៀត​ ទាក់​ទិន​នឹង​លទ្ធផល​បឋម​នៃ​ការ​បោះឆ្នោត​ក្រុមប្រឹក្សា​ឃុំ​សង្កាត់​ អាណត្តិ​ទី៥​នេះ បើ​ទោះ​បី​ត្រូវ​រង់ចាំ​លទ្ធផល​បញ្ជាក់​ផ្លូវ​ការ​ពី​ស្ថាប័ន​រៀបចំ​ការ​បោះឆ្នោត គ.ជ.ប​ក៏ដោយ។ ហើយ​លោក​​សង្ឃឹម​ថា គណបក្ស​ប្រជាជន​កម្ពុជា​នឹង​ទទួល​បានជ័យជម្នះ​ភ្លូក​ទឹក​ភ្លូក​ដី។ លោក​ថ្លែង​ថា៖ «ខ្ញុំ​យល់​ថា ក្នុង​ចំណោម​ឃុំ​សង្កាត់​ ១៦៥២ ឃុំ​សង្កាត់​នេះ​ គឺ​គណបក្ស​ប្រជាជន​ឈ្នះ​លើសលប់​ ច្រើន​ភាគរយ​ណាស់។ បើគិត​ជា​ភាគរយ​ហ្នឹង​ បើ​តាម​ខ្ញុំ​ប៉ាន់ប្រមាណ​ដោយ​ខ្លួន​ឯង​ប្រហែល​ជា​ជាង​ ៩៩​ភាគ​រយ​បាទ»។ គ.ជ.ប ​មិន​ទាន់​ប្រកាស​ចំនួន​សំឡេង​ឆ្នោត​សរុប និង​ចំនួន​អាសនៈ​ក្រុម​ប្រឹក្សា​ មេឃុំ​ចៅ​សង្កាត់​សរុប​របស់​គណបក្ស​នីមួយៗ​នៅ​ឡើយ​ទេ ដោយ​គ្រាន់​តែ​ផ្សព្វ​ផ្សាយ​ចំនួន​សំឡេង​ឆ្នោត​ក្នុង​ឃុំ​សង្កាត់​នីមួយៗ​ក្នុង​ខេត្ត​រាជធានី​នៅ​ទូទាំង​ប្រទេស។ លទ្ធផល​ផ្លូវ​ការ​នឹង​ត្រូវ​ប្រកាស​នៅ​ថ្ងៃ​ទី​២៦ ខែ​មិថុនា​ ឆ្នាំ​២០២២។ គណបក្ស​ភ្លើង​ទៀន នៅ​ថ្ងៃ​ចន្ទ​នេះ បាន​ចេញ​សេចក្តី​ថ្លែង​ការណ៍​មួយ​ ដោយ​សម្តែង​ការ​សោក​ស្តាយ​ចំពោះ​លទ្ធផល​នៃ​ការ​បោះ​ឆ្នោត​ឃុំ​សង្កាត់ កាល​ពី​ថ្ងៃ​ទី៥ ខែ​មិថុនា ដោយ​ថា​ លទ្ធផល​នៃ​ការ​បោះឆ្នោត គឺ«មិន​មាន​ភាព​សេរី​ និង​យុត្តិធម៌» ហើយ​ «មិន​ឆ្លុះ​បញ្ចាំង​ពី​ឆន្ទៈ» របស់​ប្រជាពលរដ្ឋ​ខ្មែរ» ដោយ​លើកឡើង​ថា​«ការ​បោះ​ឆ្នោត​មិន​មាន​បរិយាកាស​ស្មើ​ភាព ពលលរដ្ឋ​មិន​មាន​សេរី​ភាព​ក្នុង​ការ​ចូលរួម​កិច្ចការ​នយោបាយ​ និង​ការ​បញ្ចេញ​មតិ​បាន​ត្រឹមត្រូវ និង​ស្ថាប័ន​បោះឆ្នោត​មិន​ទាន់​ឯករាជ្យ»។ 👉 សូមចូលទៅចុច Link នៅក្នុង Bio ដើម្បីអានព័ត៌មានលម្អិត • • • • • • • • • • • • #VOAKhmer #Cambodia #election2022kh #politicskh

សកម្មជនគណបក្សភ្លើងទៀនក្នុងខេត្តកណ្តាលបង្ហាញការសោកស្តាយ និងមិននឹកស្មានដល់ ក្រោយមិនបានឈ្នះតំណែងមេឃុំ លទ្ធផល​បឋម​នៃ​ការ​បោះឆ្នោត​ក្រុមប្រឹក្សា​ឃុំសង្កាត់​កាលពី​ថ្ងៃអាទិត្យ បាននាំ​ឲ្យ​សកម្មជន​ថ្នាក់​ក្រោម​របស់​គណបក្ស​ភ្លើងទៀន​សោកស្តាយ ដោយសារ​ពួកគេ​រំពឹង​ថា​នឹង​ឈ្នះ​ការ​បោះឆ្នោត ដូច​ដែល​អតីត​គណបក្ស​សង្រ្គោះ​ជាតិ​បាន​ឈ្នះ​កាលពី​ការបោះឆ្នោត​ឆ្នាំ ២០១៧។ លោក ស៊ុន ណារិន និង​លោក ហាន ណូយ រាយការណ៍​លម្អិត​ឲ្យ​វីអូអេ​ពីស្រុក​ល្វាឯម ខេត្តកណ្តាល៕ 👉 សូមចូលទៅចុច Link នៅក្នុង Bio ដើម្បីទទួលបានព័ត៌មានថ្មីៗអំពីការបោះឆ្នោតឃុំសង្កាត់អាណត្តិទី ៥ #elections2022kh #cambodiaelections #communeelections #communeelections2022 #cambodian #voters #localelections #politicskh #cambodiapolitics #cambodia #voakhmer

អ្នក​បោះឆ្នោត​ក្រុង​បាត់ដំបង​រំពឹង​បាន​ការអភិវឌ្ឍ​មាន​តម្លាភាព​និង​សេវា​សាធារណៈ​ប្រសើរ​ជាង​មុន​​ពី​ចៅ​សង្កាត់​ជាប់​ឆ្នោត នៅព្រឹក​ថ្ងៃ​អាទិត្យនេះ​ ពលរដ្ឋ​ក្នុង​ក្រុង​បាត់ដំបង​បាន​ចេញ​ទៅបោះឆ្នោត​ ក្រោម​បរិយាកាស​ស្ងប់​ស្ងាត់។ នៅ​តាម​មណ្ឌលបោះ​ឆ្នោត​មួយ​ចំនួន អ្នកបោះឆ្នោត​និយាយ​ថា​ ការ​អភិវឌ្ឍ​ដែល​មាន​តម្លាភាព​ និង​ការ​ផ្តល់ជូន​សេវា​សាធារណៈ​ប្រសើរ​ជាង​មុន នៅ​ឃុំសង្កាត់​ ​គឺជា​ក្តីប្រាថ្នា​ចង់​បាន​របស់​ពួកគេ។ អ្នកបោះឆ្នោត​ខ្លះ​ថា​ ចៅសង្កាត់ ឬ​មេឃុំជាប់​ឆ្នោត​គួរ​ប្រឹង​ជួយ​ពលរដ្ឋ​ដែល​មាន​ជីវភាព​ក្រីក្រ។ លោកលាស់ លីបលីប​ រាយ​ការណ៍​លម្អិត​ឱ្យ​វីអូអេ​ពីក្រុង​បាត់ដំបង៕ 👉 សូមចូលទៅចុច Link នៅក្នុង Bio ដើម្បីទទួលបានព័ត៌មានថ្មីៗអំពីការបោះឆ្នោតឃុំសង្កាត់អាណត្តិទី ៥ #elections2022kh #cambodiaelections #communeelections #communeelections2022 #cambodian #voters #localelections #politicskh #cambodiapolitics #cambodia #voakhmer